مقدّمة (بقلم الأديب د. جميل الدويهي)
انطلقت الأديبة كلود ناصيف حرب مع مشروع "أفكار اغترابيّة" للأدب المهجريّ الراقي. وكانت بدايتها في الكتابة قبل تأسيس الموقع، لكنّها لم تسجّّل تلك الكتابات المبكرة في كتاب. وها كلود تثبت مرّة أخرى لمن يهمّّهم الأمر أنّها مبدعة راقية، وذات لون خاص، مفعم بالحبّ والحنين، في بوح رقيق من الروح إلى الروح، وقد استحقّت عن جدارة لقب أطلقتُه عليها "سيّدة الحنين". وفوق ذلك هي سيّدة الوفاء والالتزام، ففي كلّ مناسبة تظهر انتماءها للموقع الذي تعتبره أيقونة في حياتها، وهو الذي ساعدها للانتقال من وراء الميكروفون، كإعلاميّة ومذيعة معروفة في أستراليا، إلى ميكروفون خاصّ بالأدب، ترتدي معه ثياب الملكات.
ومن النادر أن نجد امرأة في أستراليا تكتب بهذا الدفق الإبداعيّ، فما كتبته كلود في سنوات قليلة قد تتسع له عدّّة كتب، وأرجو أن تتوافر لسيّدة الحنين الفرصة لتنشر كلّ نصوصها في كتب.
إذن، "نغمات على قيثارة الحنين" ليس الكتاب الأخير لكلود ناصيف حرب. هو خطوة متقدّمة على طريق طويل، وبرعاية مشروع مضيء من أستراليا إلى العالم، أعتزّّ به كمؤسّس، وراع لنهضة اغترابيّة مهمّة، وكذلك تعتزّ به كلود التي انطلقت منه إلى رحاب الأدب والجمال الخالد.
د. جميل الدويهي
مؤسّس مشروع "أفكار اغترابيّة"
إهداء
الى سايمون حرب رفيق الدرب وحارس الآمل... الذي غمرني بفيص محبته وتكريمه وكان لي السند الكبير في رحلتي مع الإعلام ثم مع الأدب... المضحي من أجلي والباذل من قلبه لقلبي والساهر على فرحي كما يسهر القمر على فرح الليالي ... حبيبي الغالي * سايمون حرب * أهديك هذآ الكتاب عربون وفاء وتقدير وامتنان .. شكرا من اعماق قلبي.
كلود ناصيف حرب
كلمة شكر إلى راعي النهضة الاغترابيّة الثانية
كلمة شكر من القلب إلى الأديب والشاعر والمفكّر والأكاديميّ والإعلاميّ د. جميل الدويهي، لتشجيعي والوقوف إلى جانبي، ورعايته لأعمالي الأدبيّة. وأعاهد العبقريّ اللبق عميد الأدب المهجريّ على الوفاء والمحبّة ما حييت.
صدر هذا الكتاب برعاية مشروع أفكار اغترابيّة للأدب الراقي
Project Diaspora
2019
إلى أمّي مريم العذراء
يا أمّي وحارستي في الأزمنة الصعبة... يا قدّيسة القدّيسين وملكة الأمم سلّمتك عمري وفي البحر البعيد وسط الأمواج والعواصف تركت في يديك مركبي لتقوديه إلى شاطئ الأمان... يا أمّ من أحببت كلّ الحبّ، مخلّصي وإلهي يسوع الفادي، لا تهمليني عندما آتي إليك... بل كوني معي وفي بيتي وفي قلبي الذي حوّلتُه إلى معبد للمحبّة والوفاء والطيبة والبراءة... وما أجمل ابتسامتك يا سيّدتي العذراء ترسم النور في عالمي وتحميني وتعطيني القوّة لأتابع طريقي في الصعاب!... لك أضيء شموعي وأهدي جميع كلماتي وكتاباتي ولابنك الوحيد الممجّد في قلبي إلى الأبد.
راجع من شي حلم
طيور البحر خبّروني
إنّك مشتقلي...
وأنا ناطره عالشط
بركي بشوفك راجع
من شي حلم...
معك صوت الريح
ولون الكلمات.
شمس الغروب مش وداع...
عم ترسم صورتك بعيوني
رسمه عالموج الازرق
عا كل نسمه...
يا ناسي أسامي كل الناس
وما بتنسى اسمي.
بحبك قد ما في سهر بعيوني
أنا وناطره كلمه منك
ضحكه منك...
بحبك قد ما في عبير
بجنينة حنين...
يا ضحكة العمر
يا فرح السنين.
شمس الغروب مش وداع
لا يزعل القمر
بتعتّم الدني
وبتنمحى الكلمات...
وبتسكت قيثارة الحنين.
زمان الفرح إلك وحدك
وكل الباقي ظلال.
ليش القمر زعلان وما بيحاكينا؟
كلمة صباح الخير يا قمر البحيره
يا قنديل بينور ليالينا.
عيوني عليك
وخايفة عيون الناس
ياخدوك من دربي...
وكيف بياخدوك؟
يا ساكن باحلامي
وبتسهرني وبتقول:
لا تنامي...
انا حدك وانتي حدي...
يا شمعه ما بتنطفي
ويا فرح لايامي...
وهيك بحبك.
صوتك سيمفونيّة غميقه
شمعة قلب بينبض بالمحبه...
والشمعه بتدوب وما بتنطفي...
وكل شهقة نور بتضْوي طريقك.
عم فكّّر شو عم بيقول سكوتك؟
وقديش في أسرار مخبايه ورا هالعيون؟
خبرني خبرني...
تا إربح المليون.
بيقولو صوت النهر حلو كتير
وصوت الموسيقى احلى...
وإنت صوتك سيمفونية غميقة كلها حنيه...
ويا ريت إنت قريب مني
تا قلك قديش إنت غالي عليي
ياللي عيونك ليل وغنيه
وهيك عا طول بحبك.
ما عدت أعرف حالي من حالي
كيف الدهر بيغرب آمالي
بروح ع شط الأمان تا إرمي همومي
بتغرّّّقني الموجه… وبيشرّدني الزمان
لكن أنا رح إبقى
شمس مضويّه بالسما الزرقا
وكلماتي شجرة ياسمين
ونسمة عطر عالورقه.
إنت بقلبي معبد
كل يوم بتغلى أكتر
مهما العمر يكبر...
يا احلى من الرسمه
يا ارق من النسمه
عالشجر الاخضر.
حلاوة روحك وقلبك
صوتك لبعيد بيودي
وبقشعك حدي
وانت مش حدي
وهيك بحبك.
نظراتك لبعيد
أو خمرة ومواعيد...
من هون لهونيك بودي مرسال...
وبيناتنا بحر وجبال...
وتا إلمس إيدك بإيدي
مش بالإيد.
إنت بقلبي معبد
والشموع مش رح تنطفي للأبد.
البحر بيشبه ضحكة حبيبي
وكل موجه
وكل نسمه بيخبروني قديش بيحبني...
وقديش بيشتقلي حبيبي...
قمر حلو طلع بالليل...
ما بيشبه القمر هالقمر
صار يمشي حد باب البيت.
سالتو: شو بدك؟
قلي: جايي تا اتامل عيونك الحلوين...
وتا قول مشتاقين
لا تسكري الباب
القمر ما بيحب الغياب...
حابب يسهر ليله عند الاحباب.
وهيك القمر سهر عنا ...
ومن وقتها الناس عم يحكو حكايتنا...
وكيف منخبي؟
والقمر ترك بوسه عا شفاف وردتنا...
كيف؟
بصليلك هلق
وكل ساعة
لأنو محبتك صلا...
صباحك شمس وعبير الكلمات...
ونغم أحلى من غناني الطيور.
أحلى ترتيله نبض قلبي
طريق الحنين ما بيخلص
ونحنا ناطرين...
روحي يا سنين
وارجعي يا سنين...
واللي بيبقى عا طول يبقى...
ولو كان القلب حزين.
بوسه من بعيد وديت
ت توصل لعندك شو تمنيت
ولو كانت باردة شو حبيت
إخطفها من عتم الليل
تا يدفى قلبك...
وعلقها صوره بالبيت!
شو حلوه هالضحكهّ
قولك شو عم تحكي؟
أحلى ترتيله نبض قلبي
وإنت عم تضحك قبالي...
يا قمري الغالي.
هيدا مركب حنيني
لعندك بيودّيني.
كتير زعلت بالإيّام الصعبه
ومن قلب الزعل بشوفك
وبفرح لأنك بقلبي.
معنى كلمة حب
إنو تحب غيرك أكتر من نفسك
وتضحي وما تطلب شي بالمقايل
وإنك تفرح بفرح اللي بتحبو
ولو كنت حزين...
وإنك تتعذب عا غيابو
وتضل راضي
لأنو ما بتحب تزعل حبيبك
وتقشعو بالأحلام
وتغمرو بالأوهام
وتصلي إلو قبل ما تنام
وتحلف باسمو
تا يخلصو الإيّام.
رح خبّرك شو صار عنّا
مشاني حبيبي عالورد...
عالورق الاخضر
عمّر إلي قصر من مرمر الحنين
وكل يوم بشرب من عيونو...
بلبس من حرير القمر العالي
وأوقات بزعل منو وبرجع براضيه
لأنو صورتي بتسكن فيه
وعيوني سحر لياليه...
وأنا وهوي خلود
والخلود ما حدا بيمحيه...
وهيك بحبو.
إنت الأحلى من كل الناس...
هني حروف جر
وإنت اللغة كلها.
بتقلي: انتبهي من القمر
بيتنكّر بالليل...
ليش أنا بعرف غيرك قمر
يا قمر؟
رح خبرك شو صار عنا
لما غاب القمر من حينا...
عتمت الدني
ضجر الليل
سكت قلبي
غفيت أحلامي
وماتت الياسمينة
وفلّت حكايات الحب
ونطرتْ عالباب
بركي بيمرقو عيونك...
والنطرة أبعد من مبارح
وأبعد من بكره...
ووقت اللي أنت بتغيب من قدامي
بيصيرو حقول ضجر أيامي.
لو ما إنت يا هالقمر
كان العمر متل الحجر...
حكاية ضجر.
لمسة إيدك
رح ضل قلك اشتقتلك...
ولو ما كنت معك
قلبك هوي بيقلك
إني اشتقتلك.
مع زقزقة العصافير
أحلى صباح صباحك
ومع غروب الشمس
أحلى نور نورك
شفتك بمنامي مرتين
مرة بالقلب ومرة بالعين
إيديك بايدي
وشو حلوه همسة الإيدين.
من كم يوم ضيعت قمري
لا طل ولا شفتو
فتشت عنو
وسألت: وينو؟
خبْروني يا ناس وينو؟
والناس تطلّعو فيّي
وقالو: حرام
جنت هالصبية...
تاري القمر بعيوني
وأنا عم فتش عليه
ومن وقتها ضلّيت مغمضه عيوني
تا ما تهرب منّي
يا عيوني.
ما بيلتقيو الإيدين...
والصوره مطبوعه
بالقلب والعين.
لمسة إيدك شو حلوه
فيها رضا وحب ووفا
بشوف الكون بعيونك
لما بتقلي
إنك اشتقتلي.
لمسة ايدك حنين الروح...
وبا ريت الحقيقة
هيي حقيقه
ويا ريت جروحي
ما كانو جروح!
ضيّعت الكنزه الزرقا
ضيّعت الكنزه الزرقا
عالمقعد العتيق...
قالو: الحرامي سرقها
رحت عالمخفر تشكّيت
ورساله للقاضي وديت
تاري حبيبي الحرامي...
وقلي بالمحكمه:
أنا سرقت الكنزه
لأنو فيها عطرك الغالي...
وكنت مشتاق إغمرك
يا قمري العالي...
ويمكن شي ليله
اسرق عيونك الحلوين
اللي ما بقشع فيهن غير حالي...
وهيك بحبك.
الأحلى من كل النجوم
نور عيون حلوين...
هني سحر الأشعار
وغنية الأفكار.
يسلملي المشتاق...
قمر العشاق،
وهيك بحبو... بحبو...
وبحبو.
كيف بهرب من حرمانك؟
قولك عيونك نغم
او صرخة بتجرحني؟
كيف بهرب من حرمانك
وبتخبا ورا نسيانك؟
لا تتخبى ورا النسيان
بخاف يسرقلك الليل
وتروح وتغيب...
تخبى بقلب الورده
وزورني مع كل نور جديد
وبيبشر بالمواعيد.
تخبيت بقلب الورده
ولقيتك انت انت انت
أحلى وردة عذاب وانتظار...
وما كنت عارفه انو الورد
فرحي وجرحي.
الورد لعندك وديت
هدية عطر وعنبر
وتاشوفك شو تمنيت...
هلق رجعت من مشوار بعيد...
كل الوقت ضحكتك عالشجر والسما والنهر...
يا ضحكه ما بتغيب
بترن متل جراس الضيع البعيده...
واللي معذبني اني ولا يوم بلمس ايدك بايدي...
وبالحنين بكتبلك قصيده.
وهيك بحبك.
هالطريق لوين بتودي؟
لنور صباحك...
لابتسامتك وصوتك...
البحر وشوشني وقلي:
حبيبك كتب اسمك عالموج...
من هيك عم غنّي
باسمك عم غنّي.
إنت فرحي وابتسامتي...
والليل مش اقوى من نور الافكار
وغيم الخريف
بيبشر بالورده
وهيك الفكره
لليوم وبكرا.
عيونك بحور الغميقه
ليش هالقمر ما بيروح من خلف البردايه؟
بيعرف شو بني
هالاغلى من الدني؟
مشتاقه ينزل عا ايدي
مره وحده بالعمر
تا احكيلو قصه
وما تخلص القصه...
ما بحب وقت البيكون معي تنتهي حكايتنا...
يا قمري لا تضل ورا بردايتنا...
نام بحضني دقيقه
تا خبرك الحقيقه
وقلك: انت انت انت حبيبي
وغنية الفرح بجنينتنا.
بالاسود والابيض
بكل الالوان...
بكل الاشكال...
بكل المسافات...
بكل الاغاني والقصايد...
بكل نبض وحرف...
بقلك انو كل الحروف انت
وما بدي من اللغة الا حرفين:
ح ب...
وهيدا شعوري فيك انت.
ما بدي صباح ولا مسا...
ما بدي نهار وليل...
ما بدي شتي وصيف...
ما بدي حلم ولا حقيقة...
بدي عيونك انت
وعيونك بحور الغميقة
ولا تنسى تفكر فيي كل دقيقه.
رموشك شمسية حنين
يسلملي القمر
كيف نزل عالارض
وصار بين الناس يمشي...
وما عطاني الا ضحكة عيون
ومن الحنين كمشه.
رموشك شمسية حنين...
ومين بيداوي قلب حزين
وعيون مشتاقين؟
حبك يا حبيبي عذاب السنين.
خايفه لا شي يوم
دوب انا وياك
متل ما بتدوب الشمعه...
والحنين يصير شعلة نور
وقمر بالعالي...
وما عود اعرف حالك من حالي.
أنا فراشة زرقا
بلون السما
وبعطر الليلكي.
صباح صوتك
رنين الحنين.
بوسه عا وجك
تا تخبرك قديش عندي حنين...
بوسه عا شفافك تا تطبع قصيده بمعاني جديده...
بوسه بعيونك تا تضل تتذكر عيوني الحلوين...
بوسه عا قلبك يا قلب ارق من الياسمين...
بوسه عا خطوط ايديك
تا ضل انا وحدي وحدي ماشيه بعروقك
واصرخ "بحبك والحب للخلود" ...
وبوسه عا ابتسامتك الاغلى من الدهب...
ياحبببي الاغلى من الوجود.
هيدا احلى قمر
كل الناس قريبين وهوي بعيد...
كل الورد بقطفو بالايد
وهوي ورده عاليه...
وبيضل الغالي
والاغلى من كل الغاليين ...
ولولا كنت محرومه طول السنين
وهيك بحبو.
سرقت قمر البحيره
كنت زغيره
وكان في قمر يخاف عليي
ويرافقني عالطريق...
وهلق كبرت
وبعدو القمر ما بيكبر
بس كل يوم بيحبني اكتر.
مبارح سرقت قمر البحيره
اللي منهرب لعندو...
وفي ناسعرفوا قصتنا
سرَقت القمر وخبرتو حكايتنا
وخبيتو بقلب القصيده
تا تضل لياليك مضويه
وتضل إيامك عيد
ولما تجي لعنا
بقلّك: لا تفل...
بقلب عيوني ضلّّ
بعدو القمر سهران
وبيزعل لما بتروح من عنّا.
يخليلي صباحك...
صلا وبخور
وعطر الغابات....
حنين الطير للوادي
واشوق الموج للشط الهادي.
لا تغمض عيونك
تا ضل شوف الحلا...
تا روح خلف الاسرار...
واذا التقينا عا طريق بليل وشتي
اغمرني بركي فيك بدوب...
بركي بصير انا انت وانت انا
عندك بلاقي حالي
يا اغلى من الغالي ...
يا قنديل عمري
اللي ما بينطفي بعتم الليالي.
وهيك بحبك.
حدّي وإنت بعيد
بعرف إنك حدّي وإنت بعيد
رغم التعب والإيام الصعبه
قنديل نور عا دربي
خدني بإيدي حبيبي
عا جنينة ورد وعبير...
خدني فوق البحر الكبير...
خدني عا نجمه مضويه...
واحكيلي حكايه ما بتخلص
عن أمير وأميره حبو بعضهن هني وزغار
وكبرو... وصارو غنيّه
أول كلمه فيها: "بحبك"...
والموسيقى ضحكه من عينيّي...
وهيك بحبك.
بيمرق الشتي
وبيمرق الصيف...
وإنت إنت...
صوتك الغنيه
وحنينك ورده ما بيجرحها السيف...
قمر البحيره عا طول بيقلي
إنك اشتقتلي...
وإنك إسوارة من دهب غالي اشتريتلّي
وقصيدة حبّ عنوانها "إنتي إنتي"
بعطر الياسمين كتبتلّي.
صباح رموشك
المتل ريشتين من حبر...
وعطر
وعندي كل رمش اغلى من قصر
بحب عيوني يجرحوك
بحب ابتسامتي تكون عذابك...
وبحب تشتقلي...
وانا بشتقلك
وما بتروح من بالي
يا بعيد وقريب
ومتل ما البحيرة بتغمر القمر
هيك بغمرك بأحلامي...
وبقلك: إنت وحدك وحدك
أغلى حبيب.
يسلملي عطر الورد
من تياب حبيبي.
قمر البحيره بيضوي طول الليل
عا شعري الأسود
عا سيف عيوني...
وبيحكيلي وأنا بسمع
هالحلو الغالي
هالقنديل العالي
قمري أنا
وما بيروح من بالي...
وهيك بحبو...
كل دمعه حبّّة لولو
لا يبكو عيونك...
كل دمعه حبة لولو...
رح اجمعهن
وإعملهن عقد عا صدري
وعطرك الحلو رفيقي
وأحلى من عطرك بكتير
حبك الكبير.
ناطره عا مفرق كل طريق
يمرق طيفك الغالي
وإركض ليك
وضمك لقلبي
وقلك: لا تغيب عن دربي
ضلك طلّ عليّي.
ما في صلا عا شفاف الرعيان
بتشبه صلا قلبي...
كل صبح بتطلّع بالسما
وبقول: تسلملي...
وما حدا غيرك بيوعيني
عا أحلام فيها عطر وزنابق
وبحر هادي...
كل يوم بحبك
وكل سنه بحبك
بأول نيسان وبآخر نيسان...
لأنو تيابك الربيع
وصوتك النهر
وحنينك عا شباكي
متل عصفور بيغني
وبيشلحلي ورده حمرا
وقمر البحيره بيحكيلي كلام عنك
وبيقلي: للموت بيحبك
للحياة بيحبك...
وإنت الربيع والشتي
وكل الفصول اللي فيها حب وحنين
وجمر عذاب وانتظار...
إنتي إنتي.
وردات للخلود
أربع وردات من جنينة قلبي
ازرعهن بجنينة قلبك...
وردات للخلود.
ملكه بالأبيض
والحبر الأخضر قصر
عم يضوي من شهر...
وفي ناس قالو:
اليوم خلق أمير حلو كتير
والصبيه عا شفافها غنيه عا دق العود...
أول كلمه فيها "بحبك"
وآخر كلمه "خلود".
شو بمْلك أنا منك إلا كومة صور؟
إلا حنين القلب الحزين وليل السهر؟
إنت ومعي ما بلاقيك...
لا إيد بتلمس إيد...
من هيك بقلّك وانت بعيد:
يا حبي الوحيد
أنا بحبك
أنا بحبك
أنا بحبك...
متل ما البحيره بالليل بتحب القمر
وانت وحدك عندي
اغلى من كل البشر.
ورده عالبيانو
صباح الخير والسعاده من سيدة الحنين
ومرفأ عيونك اللي هني كل الحنين...
إلك وحدك وحدك وحدك كل الحنان
ولعيونك أشواق قد البحر.
مبارح متل هالوقت سمعت حنين الطير
من جنينة أحلام
وعطر غالي كتير...
والقمر عالشباك قلي: شو بكي
يا هالصبيه ملبكي؟
قلت: الأمير ما طل عليي
وما لمس أيديي
وأنا بغيابو أميره بقصر...
بس ما في دهب ولا حرير عم يلبق عليي.
ورده عالبيانو...
والبيانو هديه من البنت الزغيره
اللي عيونها حلوين
وكبرت وصارت سيدة الحنين.
أنا والناس ما بلتقي بالناس
بلتقي بصوتك… بعيونك...
وبخاف حدا ياخدك وما عود لاقيك
من هيك بين كحلة عيوني... وعيوني
عا طول بخبيك.
شمسيّه من عطر حنين
هلق أنا تحت الشتي
عم فتش عا شمسيه
من عطر حنين
من زهر الياسمين
غطيني بعيونك
خبيني تحت جفونك
تا قلك قديش بحبك
وبحب جنونك.
ورده من جنينة قلبي لقلبك
تا عطرها يرافقك عا دربك...
وكل نسمه تقول: هيك بحبك.
مبارح متل هالوقت
سمعت حنين الطير
من جنينة أحلام
وعطر غالي كتير...
والقمر عالشباك قلي:
شو بكي يا هالصبيه ملبكي؟
قلت: الامير ما طل عليي
وما لمس ايديي
وانا بغيابو اميره بقصر...
بس ما في دهب ولا حرير
عم يلبق عليي.
إيه وين الكلام
إيه وين الكلام؟
عا طول بسألك بس تكون ساكت
لأنو كلامك مرْكب بيروح عا مطارح بعيدة...
يا سارق قلبي… وما حدا قبلك ولا بعدك...
وهلق ناطرتك تا نشرب القهوة سوا...
قهوة مُرّه… وبيحليها حضورك وشعورك...
ولا تنسى تشرب من عيوني اللي بتحب...
وبتقلي أحلى عيون إنتي
ونبض قلبي إنتي...
وما فيي قول: هيك بحبِّك
لأني بكرا بدي حبك أكتر...
وبعد بكرا بدي حبك أكتر.
شفتك بمطرح… بكل المطارح...
بقلبي وعيوني… بين الفكره والفكره
وبين مبارح وبكرا وبين بكرا ومبارح.
قمر الصباح بيقلك: صباح عيونك الحلوين...
وآخر إحصاء للسكان: إنت إنت وإنت.
ما بتطلّع لورا...
بفتح الباب عا بحر… عا سما أشعار
عالشجر الأخضر
عا قمر منور...
وهيك رح كفي المشوار.
ليش الحبّّ انتظار؟
نغمة حنين عيونك الحلوين
وأنا بعزف عا وتر روحي
غنية حب وأشواق...
وبسأل حالي كل ما تطلعت بصورتك:
ليش الحب عذاب وانتظار؟
وليش القدر خلاني حبك من بعيد
وعيش حياتي مقهوره؟
وكل ما قلت: هيك أنا بحبك
بيصيرو دموعي برواز للصوره.
شي كلمه حلوة
مخبايه تحت شي مخدة؟
معلقه بخيط حلم؟
كلمة "بحبك" أحلى من عمر
وأغلى من قصر
وأغمق من حنين الفجر.
لو ضعت بالغابة بلاقيك بعيوني.
يا ريت هالغابه ما فيها حدا
إلا أنا وحبيبي والصدى.
لا تخاف...
مش قلبك بيدلك
قلبي أنا بيدلك...
وكل لحظه بيقول:
هلقد اشتقتلك.
شو بدي قلك
اكتر من كلمة اشتقتلك؟
قولك عم تسمعها
مع طيور الحب والسلام؟
قولك عم بتشم عطرها
عا كتف وردة الأحلام؟
قولك عم ترسمها بعيوني
أغفا ونام اشتقتلك؟
يا حلو والخبر الأحلى
إنك عطر الأنغام.
أميرة زغيره خطفوها عينيك
لا تنسى...
يضل شباكك مفتوح
تا ابعتلك نجمه زرقا
وكمشة حنين من عيون مشتاقين
وقلبي طير الفرح
بيزيح البردايه تا يحكيلك حكايه
عن اميره زغيره خطفوها عينيك
وبتضل مشتاقه عليك...
وهيي وبعيده كتير بتكون ورده
عا رخام ايديك
وهلقد واكتر انا بحبك.
مع كل طلعة شمس بشتقلك
مع كل طلة قمر بشتقلك
حضورك فرحة عمر
ومواسم غمر...
وغيابك وجعي
والضحكه مش ضحكه
إلا إنت ومعي.
إنت إنت إنت
روح عالارض
وقمر بسما حروفي
وأنا ما بغفا من صوت عيونك...
وهيك بحبك.
شعور الورده العطشانه
إيه... حبيتك وحبيت السهر
تا شوفك جايي من بعيد...
وعا ضو نجمه قريبه إغمرك
وقلك: يا حبيبي...
قديش حكيو العشاق عن الحب؟
شعوري اقوى
شعور الورده العطشانه لقطر الندى...
يا ريت الزمان بيجمعني فيك
تا اتطلع بعيونك عالهدا
وقلك: يا روح ما بتفارقني...
يا كلمه خلقت معي
ولو ما كانت هيي
ما كان عندي صوت
ولا كان لحروفي صدى .
ضحكه من قلبي
ضحكتها يوم اللي لقيتك
ما كنت حبك
ما كنت اشتقلك
ما كنت احزن بس تغيب...
وتغيرت...
رجعت طفله زغيره بتحب
وبتجهل
وبتخرطش عالحيطان
وبترجْع عالبيت شعرها عم بيطير
وبيسألوني الناس:
مين حبيبك؟
بقلهن هالقمر الكبير...
هالاحلى من الامير.
وهيك انا بحبو.
لما بكون ملكه بفستاني الابيض
بيكون قلبك حارس الي
ما بضيع بطريق...
ما بخاف من العتمه...
والشمس قدامي نور عيونك
وبشوف حالي لانك معي
انت فيي ساكن...
بقصر من دهب ابتسامتي
وما في ضحكه الا بتشبهك
يا ضحكة عمري
يا فرح اعيادي...
وهيك عا طول بحبك.
كلمة حبيبي نور القنديل
أنت فرحي وفرحتي
ورده من جنينة ايامي
من غابة احلامي.
ما بتدبل...
خلقت مع الريح
والعطر مراجيح
متل حنيني الك ما بيعتق...
وبيصرخ عا كل مفرق:
هيك أنا بحبك.
وقفت عالمرايه بفستاني الأبيض،
شفت حالي بنت زغيره
وأنت شقي عم تلحقني عالطريق
وبرجع عالبيت من عشيه
وبعيوني خبريّه
وتسألني إمي: وين كنتي؟
وبقول كنت عند رفيقتي
ونزل الشتي...
وليكي فستاني
مبارح اشتريتو ويا ريتني خبيتو...
وفي صبي شيطان لحقني وتخبيت
من هيك ما رجعت عالبيت...
وهلق صرت كبيره وبعدك لاحقني
وما بتفارقني...
وبجرب إكذب عليك
وقول أنا ولا يوم حبيتك...
وبس اتطلع بعينيك بنسى الكذبه
وبرجع بقول: هيك أنا حبيتك.
تسلملي... وجبينك عالي
ما بيطالوه الخياله.
بلل المطر قلبي المتروك
عا ضفة النسيان
نزل الشتي وغسل تيابي
روى قلبي العطشان
لكلمة فرح من اغلى احبابي...
نسيت من كم دهر ما مشطت شعري
ولا لونت عيوني بكحل الليل...
من كم يوم لا شفتك
ولا حكيو معك عيوني
حسيت كل لحظة كانت عمر
ودهر بحالو
لا تزعل يا طير الحب من شتي الايام
يمكن صار هيك تا حبي يخلق من جديد
ويلبس تياب العيد
وكلما سألوني: شو بكي؟
بقلّهم: شتي شتي
وعيوني دابو من شوق وحنين
للقمر اللي حبيتو من سنين.
ذكريات العمر
هنّي قنديل الحروف...
وكلمة حبيبي نور القنديل
بالليل الطويل.
شمسيّه من نور عيوني
عطيتَك شمسيه من نور عيوني
وما بتروح ولا يوم من كحلة جفوني.
قَلي: لا تلعبي تحت الشتي
بخاف عليكي من البرد
بخاف الشتي يبلل عيونك
وتزيح كحلة رموشك اللي بحبها...
وتمشي عا بحر النسيان
وتتركي قلبي العشقان
ويسرح عا شعرك الاسود مطر نيسان
وتنسي حبيبك اللي حبك من زمان...
قلتلو: لو بتعرف يا حبيبي
قديش بحب إلعب تحت الشتي
انا أركض تحت المطر
وانت تجن تا تلاقي شمسية منتخبى تحتها
وتغمرني بحنيه
وتقلي متل كل يوم:
هيك انا بحبك يا اغلى صبيه.
شاردة فيك ولحروفك عم غنيك
يا دقة قلبي… يا نور عيوني
يا رقة احساسي
يا لحظة خلودي
هيك انا بضل فكر فيك...
وأكتر من هيك بحبك.
بكتبلك إيه بكتبلك
هالأميرة اللي ناطره
أمير الحب والأحلام
بعتت الو هديه
كتاب اخضر متل الربيع...
متل موج الحنين
تا تقلو:
هيك أنا بحبك
وحنيني إلك ما بيخلص
حنين أصلي
من شمع وأرجوان
يا أمير الزمان
أنا وإنت منصير غنّيه
وانتظاري إلك هوّي النور
والنغمة عا شفاف الكمان...
صباااح الخير
بكتبلك… إيه بكتبلك
قبل ما تفيق من النوم
وكنت بأحلامك...
بعرف أنا وغايبه
بْكون قدامك
وبعرف إني عبير الورد
بقلامك...
انا الماضي والحاضر
وأغلى إيامك.
وهيك بحبك.
يااا حلو... اشتقنا
ومعليش لولا الزمن فرقنا...
إنت الكلمه والبسمه
ورقة النسمه...
انت الحلم
الأبعد من البعيد
وكل ما بفكر فيك
بلبس فستان جديد...
وبعنون كتابي:
إنت حبي الوحيد.
هالورده الغريبه
يا طير الحمام،
قلو لحبيبي:
هالورده الغريبه
قطفتها من جنينة قلبي
ووديتها لبعيد...
خليه يزرعها عالمفارق
ويتذكرني كلما مرق عيد
وضحكت المواعيد...
وقلُّو لحبيبي إنو حبيبي
مش لليوم ولا بكرا...
لزمان الخلود...
ونحا خلود الفكره.
فرحت فيك
وطرت بحالي
ولملمت شالي الحرير
اللي طار بالعالي
وقلبي طار بالفضا
والسما تسمع دقات قلبي...
قديش غنو إلك...
رح خبي كمشة فرح بعيوني
بخاف تشتي الدني
وتضيّع عنواني
ويلفّ الضباب بيتي وحياتي
وتهجر طيور الحب جنينتنا
ويغطي الورق الأصفر ضحكتنا
وتدبل وردة الحب
وإغفا انا مع عتم الليل
وتنتهي قصّتنا...
من هيك رح ضل خبّي
بغابة الأماني صورتنا
حتى ضلّ شوفك كلّ يوم
وإفرح بعيونك أنا
يا فرح قلبي
وضحكة ايامي
وعطر أحلامي
وقمر حكايتنا.
صلّيت تا شوفك حدّي
أنا ملكة الحب الجميل
وبتسلط عليك برمشي الطويل.
بتعرف قديش في فرح بالدني؟
بتعرف قديش في فرح بالسما
كلما طار عصفور وسافر لبعيد؟
بتعرف شو بيفرحو الحبايب بكل عيد
لما بيكونو مجموعين
وبيحكي الحنين بالعيون المشتاقين؟
بتعرف قديش في فرح بقلوب الأطفال
هني وناطرين هدية العيد؟
بتعرف قديش في رضى عا مخدة الفقير
لما الخير بيحضن إيامو
وبيغتني بأحلامو؟
بتعرف قديش في غبطه وسرور
لما بتصير الأفكار شجره
وبيصير الوعد زهره؟...
هيك قلبي بيفرح كلما كنّا سوا
وإيدي بإيديك صوب الفرح رايحين
من وقت اللي كنت زغيره
صليت تا شوفك حدي
وأعطيك من عمري ورده...
وعطيتك ورده
وقلتلّك:
هيك بحبّك.
قلبي بيصير حديقه
قلبي بيصير حديقه
بس إضحكلك...
الضحكه بترن متل الفضه...
متل إسوارة لبستها بالحلم
وسمعت حدا عم بيدق عالباب...
هيدا حبيبي
يعني إنت إنت إنت...
يا ريت كنت جايي لعندي حقيقه...
بس حبي إلك حقيقه...
وكل شي بيتغير إلا هيي...
يللي اسمك بقلبي غنيه.
إنت بعيوني...
وسبب ضحكتي.
ماشيه وعم فتش عليك
انت عا أي كوكب فليت؟
مهما تروح...
ومهما تغيب
بقلبي بتضل
وعيونك إنت حبيت...
احلى كلام كلام عيونك...
احلى سلام هدوءك وجنونك.
يا ريت فيي التقي فيك
تا عطري يتغلغل فيك
وبين رموشي تغيب
وما لاقيك.
ليش تا تكون هلقد بعيد؟
حنينك حلو...
بس الحنين جرح
ونغمة طير وحيد…
ومن هونيك لهون
ما فيك تلبسني الفرح
إسوارة بالإيد..
يا ريت قريب مني بتكون...
وأقرب من حالي عا حالي تكون
تا اشرحلك من دون حكي
بنظرة من العيون
قديش أنا بحبك.
البحر ما بيساع حنيني
رايحه لعندك...
إنت البحر الكبير
والبحر ما بيساع حنيني إلك
يا أغلى أمير.
بالأيام اللي راحت
والأيام اللي جايي
إنت إنت إنت وحدك
كل الحكايه
وهيك بحبك.
صباح الحنين والحب
والروح اللي بتسافر
من عندي لعندك...
وتقول: بحبك يا حبيبي...
وإنت النور لعيوني
باإايام الغريبه.
البحر الغميق نظره
وما بخاف إغرق
يا بحر كلو أمان...
وأحلى عيون
تركو حريق عالسطر
من أول الزمان...
وهيك بحبك.
يا عطر السنين
طير الحب والسلام
رح يغطّ حد شباكك يا حبيبي
ويعطيك ورقه مكتوب عليها
حروف زرقا:
هـ ي ك ب ح ب ك.
صباح القلب النقي
صباح عيون الحنين...
اشتقنا يا قمر الحلوين
يا عطر السنين...
انا وانت الحب والخلود...
ورح نبقى يا حبيبي
هيك عاشقين.
يقولو انو القلب ما بيساع
الا واحد
وانا بحب تلاته:
إنت وإنت وإنت
ومحتاره مين من التلاته
بحب أكتر...
وأكتر من هيك بحبك.
يا رفيق السهر
كل صباح
من غير ابتسامة عيونك
بيكون ليل...
لا قمر بيطلع
ولا نجمه بتضوي...
وكل عتم بيمرق فيه خيالك
بيصير حديقة نور.
وبتسألني:
لمين ابتسامة عيوني؟
إلك وحدك خلقتْ ابتسامتي...
ولو ما انت بحياتي
كنت بشلحها بالنسيان
وبعمّر خيمه للاحزان...
وهيك بحبك إنت إنت إنت...
يا رفيق السهر..
يا أحلى من القمر.
أول مرة
بيطلع من صورتك عطر...
بيعبي البيت...
بيكسر قزاز اللحظة...
العطر بيمشي
من مطرح لمطرح
بيفوت بتيابي
وبيحكي معي...
بيقلي: تسلميلي...
هيك بيقول أمير انتظارك.
وهيك بيحبك.
لمين هالضحكه
اللي متل حرير السهل...
متل مراية الزنبق؟...
عيونك شغل ساحر
بيعرف إنو لازم إتعذب
بس شوفك...
هالساحر مرجحني عالمواعيد...
ولما رحت عالعيد
ما لقيت حدا...
هرب الزمان...
وبقيت أنا وخيالك...
وكان خيالك حدّي
بس عني بعيد.
وهيك عا طول بشتقلك.
عيوني بيكتبو عالورق
بتعرف إنو اللون الأبيض ورق الكتيبه...
وعيوني بيكتبو عالورق كلمه "حبيبي"
وهيك بحبك.
عيونك حنيني
وأنا قدامك متل الورقة
اكتبني بلون السما الزرقا:
انا وانت والحب اللي بيبقى.
شو بكتبلك؟
شو بقلك؟
مبارح شفتك
واليوم شفتك
وبكل لحظة بهمس اسمك...
بحس حالي طرت بالعالي
ومع طير الحب ورده بقطفلك
تا قلك: هلقد بحبك.
هالورده حكاية اسمها انا وانت...
وشو حلوه هالحكايه!
وانا يا حبيبي الورده
وانت الربيع اللي جايي...
اهديني ورده
بكتب فوق الصوره...
بكتب تحت الصوره إسمك إنت
يا كل الاسامي
يا فرحي وايامي
مرسوم عا جبيني حبي وحنيني...
ومن وقت اللي لقيتك عشت أجمل سنيني...
برسم قلبي عا ورده
وبرسمك ورده عا قلبي...
قالو الورد غالي
وهوي بيدبل بالخريف.
وانت قلبك وردة كل الايام...
وكل الاحلام.
غيابك حنين
وأنا والقمر عالشباك ناطرين.
هيك بتغيب عني دقيقه...
والدقيقه أطول من سنين؟
بس ينامو عيونك شوفني باأاحلام..
الحلم ما بينام...
اهديني ورده...
كلمه...
وقلي: إنتي حلوه
تا تحلا الإيام.
خايفه إبقى عندك
المحبه هيي اللي بتزرع السهل
قمح ومواعيد...
وكلما الياسمينه تلبس فستان جديد
قلبي بيتركني
وبيروح...
تا يفرح بالعيد.
زيارتك شو حلوه
هاديه هالنظره لبعيد...
قلبي ركض تا يلاقيك
ويغمرك
والفرح يعطيك...
خايفه إبقى عندك
وما إرجع عا بيتي...
إسكن بخيالك
يا ساكن بخيالي...
وما عود أعرف
حالك من حالي.
نهر حنين
متل النهر اللي بيروح لبعيد
هيك حبي إلك ما بينتهي...
يا حبيبي.
متل ما المركب بيلامس الموج...
متل ما القمر بيلامس الشجر...
مشتاقة للمسة إيدك...
همسة حنين بتغير الزمان
وبتسرقنا من اللحظة
تا نروح عا مطارح بعيده
نحنا والسهر والليل...
وايدك تصير حريق كبير عا إيدي...
يسلملي صباحك...
وموعد القلب ساعات...
وأحلى شي بكل الاوقات
حضور عينيك
وهمس قلبك.
نهر حنين
ما بيشرب منو حدا إلا الغاليين...
كل أشواقي إلك
وليش بتسأل:
هالحلا كلو لمين؟
مرفأ الحنين
يا ريت عا مرفأ الحنين...
بيتلاقو المحبين
تا يقولو كلام هوي فرح السنين...
ما التقى متلو بكتاب
هوي العاصفه
والشمس
والبحر
وعطر الياسمين.
يا ريت نظره بعيون حبيبي
وإغرق وما عود أعرف إرجع...
سكوت متل هدير الغابات بالشتي...
إيد بتلمس إيد
ويصير الحنين بلاد
فيها نجوم وقمر وسهر...
هلقد نطرت هاللحظه
وهلقد اشتقتلك.
أناعروس الحنين
والوفا
والانتظار ...
وعا مرفأ شاطئ الأحلام والأشواق
بنطرك…
ما تتأخّر.
كان الصباح صلا
كيف بيبتدي نهار
من غير ما شوف صورتك؟
كيف بيكون فرح
من غير عيونك وابتسامة قلبك؟
الصباح قبل ما يخلق كان صلا،
وبعد ما لقيتك حبيبي
عالدرب الطويله...
صار ترتيله.
ليلة سحر ليله التقينا فيها...
كنت حدي منل الامير حلو كتبر
وعطرك كان غيمه فوق الليل ...
كان القمر اكبر والنجمه خاتم الماس.
بتتذكر؟
مسكتني من ايدي
وصارت الدني احلى
وانا طفله زغيره
يمكن تاخدني عا غابة موسيقى
وتهديني حرير غالي
وقصر عالي.
عرفت قديش بتحبني من نظره...
من همسه رقيقه...
مش اكتر من دقيقه. ..
وخلصو المواعيد...
وبعدو هاك الليل قمر وسفر بعيد...
من هون لعندك وحدك
يا حبي الوحيد.
قد ما بيحبني هالقمر الغالي
بعتلي قلوب من السما عا لون فستاني
وقلي: "إنتي الحلا والربيع
وسحر الليل والنهار
وأنا ما بشرب كتير...
بس كرمالك رح انزل عالأرض
وإشرب نقطه من كاس النبيد
وإسكر بريحة عطرك
وابتسامتك الحلوة يا حبيبتي...
يا أحلى من القمر".
قلّي إنتي حلوه
هالصوره بترجعني زغيره...
بتخلصني من الزمن اللي رايح
وكلّ زمن بيروح لعندك...
بيوقف عا بابك
وبيغلّ بتيابك...
صوره وحيده بتقلي:
لا بقا تكبري.
روحي لعندو وقوليلو: إنت حبيبي...
خلي هالكحل يزيح من محلو
ويهرب الخوف...
غمره وكلمه وبسمه
يكونو كل الوجود…
وغنّيّة خلود.
بس ينامو عيونك
شوفني بالأحلام...
الحلم ما بينام
اهديني ورده… كلمه...
وقلي انتي حلوه تا تحلا الايام.
غيابك حنين...
وأنا والقمر عالشباك ناطرين.
هيك بتغيب عني دقيقه...
والدقيقه أطول من سنين؟
زعلي منّك حلو
قبل ما يسرقو العشاق كل الورود
جمعتلك باقه حلوه
كل وردة بلون
تا قلك:
هيك بحبك وأكتر...
عروس الكلمه
رح بتزين حالها بفستان ابيض حلو
متل قلبك
تا تكسر حيطان الصمت
وتخلي من جديد الفرح يغني
عا شباك القلب
ويرجع عصفور الربيع يقلك:
صار الورد بستان
والصبيه زينت شعرها بالياسمين
اللي عطرو فاح عا كل الدني...
لا تخلي العتم يغطي عيونها
اللي فرحو بعيونك الغاليين
وهيي رح تشتري الك
دزينة حروف من دهب
من بياع الحب
عا قد شهور السنه...
تا تضل تتذكر
كم مره غنت إلك
انت ونايم
لأنك الحياة بقلبها
تا تفنى الدني
ويعتم الليل
وتخلص حكايات الأحلام.
هلق طلع الضو عندي
بس طليت عليي...
من هلق لمية سنه
رح ضل اقطفلك ورد
وخبيهم لقمر الليل
تا ضل شوف وجك الحلو
قنديل بعيوني
ويهمس عا طول العمر:
انت حبيبي.
قريبه منك وفرحي قريب...
بعيده عنك قلبي غريب.
من هيك سميتك اغلى حبيب.
هالزعل بعيوني
من يوم ما كنت قاسي معي
بس زعلي منك حلو..
وبيذكرني باسمك.
ورا كل ابتسامه
الف قصه وقصه...
وعنوان كل القصص "حبببي انت".
انا وانت وحدنا...
وتعتم الدني...
وتنطفي الكهربا
تا حط ايدي بايدك...
تا قلك: بحبك.
وعيدها وعيدها بصوتي اللي بتحبو
ويكون شاهد عا كلامي حنينك
وضحكه حلوه من عيونك.
وهيك بحبك.
بقطفلك باقة ورد
ورده من قلبي
ورده من عيوني
ورده من روحي
ورده من دفتر اشعار
ورده من بلورتي
اللي بتحب عطرها...
بكرا بيصيرو جنينه
تا يفرحو عيونك
يا وردة حبي اللي ما بتموت.
بعيونك حبيبي حكي
مرق العيد
ورح ننطر بعد سنه...
ويمكن المفرق يهرب منا
والإيام توقع عالرصيف...
بعيونك حبيبي حكي
وقديش بحب عيونك.
رح إكتب عا كل لحظة...
عا كل انتظار...
عا كل شمس بتطلع
فوق شباكك العالي:
بحبك بحبك بحبك.
أول لمسه
أول همسه
أول كلمه
أول نغمه
أول حرف
أول قصيده
أول مره كانت إلك
لأنك أنت أنت أنت
الاول والأخير.
اول مرة حبيبي بلمس ايدك.
انا الرقة وانت الشتي.
انا البحر الهادي
وانت الريح اللي بتغرق المراكب...
بعيوني معزوفة حنين
وبعيونك نشيد انتظار.
يا ريت فيي خلصك من انتظارك
وتبقى هاللمسه الحلوه طول العمر...
وطول العمر ما بنسى اللحظه...
وما بنساك
وهيك بحبك.
بقلبي انت انت انت
وحدك العيد.
نطرت الربيع تا اقطف ورده
ما لقيت ورده بتشبهك
وبعد سنين مرق ربيع عمري
وعطاني ورده بتضحك متل عيونك
بتحكي متل سكوتك
بتفرح وبتفرحني ...
ورده متل العيد.
كل يوم فستان جديد.. .
وكل يوم عطر لفرح العيد.
ابعتلي ابتسامه
بتعرف قديش عيونك حلوين
بيكتبو كلام الحب هني وساكتين...
يخليلي قلبك وصباحك
وكل لحظه بحياتك لحظة حنين.
ما بحب صورة انت مش فيها...
لا تبعت ورده،
ولا حديقة،
ولا عالم،
ولا مجرات بعيده.
ابعتلي ابتسامه من عيونك.
سلام من سما الورد
لسما صباحك الحلو يا حلو.
أول حرف من اسمي
وآخر حرف من اسمي
هني اسمك.
بيعذبني حزن عيونك...
وقديش في حنين بهالسكوت؟
قديش في كلام وقصايد
مخبايين ورا هالنظره؟
وجع اللحظه عم يحكي ويقول:
انا ومعك اشتقتلك
وانا وبعيده عنك اشتقتلك...
وما قلتلك اني بحبك
بس انت بتعرف انك حكايه حلوه
مكتوبه بحبر عيوني
وبسهر جفوني.
اهمس لي يا حبيبي
تا اسكن بنجمه
وامشي بين السما والارض...
بحب اغفا عا كتفك...
ابكي عا ايديك...
اصرخ من حنيني الك:
انت الاول والاخير.
انت قدر حلو كتير
واكتر من هيك بكتير بكتير
انا بحبك.
قمر البحيره
هالقمر اللي فوق البحيره
بيتسرّق عا شبّاكي
وبيسهر طول الليل
حبّيتو من بعيد
وحاكيتو
ومرايتو بتكبر وبتكبر
وقلي إنّو بيعرف إسمي
ووقت اللي كنت زغيره
كان يشوفني عالطريق
ويضحكلي من فوق
ويسرق خيط من شالي
وكانو رفقاتي يسألوني عنّو:
ايش القمر اللي بيحبّك
ما بيشبه قمرنا؟
كبير وعالي كتير
وبيلبس حرير
وعالبحيره مرايتو
بتحكي كلّ حكايتو...
هيدا القمر حبيبي
بينزل عالهدا قبل ما إغفى
بيهرب من المرايه
وبيزيح البردايه
تا يشوف عيوني الحلوين
هالقمر شاغلّي بالي
أوقات بيغيب كم يوم
معقول عم يسهر عند صبيّه
بالضيعه القريبه؟...
وناسي إنو هوّي حبيبي...
يا ليل طوّل تا يبقى حدّي
غير هالقمر ما بدّي
و تركني وراح
دموعي بيصيرو بحيره عالمخدّه.
زمان يا حلو
تحيّه من رُوحي
وخلي روحي تحكي عا شفافك العطشانين.
زمان يا حلو ما شربنا القهوه سوا
ومع كل شفه ما دردشنا وخبرنا حكايتنا للهوا
شو رأيك تختصر المسافه وتجي عا حينا؟
وهيك بيغارو الصبايا وبيفرح قلبي انا...
ريحة عطرك...أناقتك... صوتك...
لمستك عا إيدي...
صرت بدني جديده
بعالمك اللي كلو حرير وأرجوان...
وكيف ما بحبّك يا أمير الحب والحنان؟
مبارح كانو عيونك عم ينحتو قصايد
عا دفتر قلبي...
وعرفت قديش أنا بحبك...
لا تغيب عني ولا لحظه يا قمر الزمان.
لا تهملني بتصير حياتي غنية أحزان.
أنا وقريبه منك
بصرخ من لهفتي إلك...
من حنيني إلك:
أناااااااااا بحبك.
شو تغيّر الكون
الورده اللي زرعتها عا بابي
بيسحرني عبيرها...
بغمّض عيوني وبقول:
لعيونك انا مشتاقه
من كم سنه
ما تطلعت بعيونك
شو تغير الكون!
من يومها ما عدت أعرف
الليل من النهار
ولا داقو عيوني النوم
قولك رح إرجع
شوف سحر عيونك
وتسلّم عليي يا حلو
متل ما كنت كل يوم؟
لعيونك حبيبي حروف ما بتموت
وعا شباكك وردة قلبي
اشتقتلك من هون
لأبعد من الكون...
وصوتك البعيد
فرّحني وجرحني...
واحلى شي انو زعَلي منك
بيذكرني فيك
من هيك بِفرحي ما بنساك
وبعتبي عليك بلتقي فيك...
يا ساكن بكل المطارح
وكلما تضيع مني يا فرح عمري
بعيوني بلاقيك...
وهيك بحبك.
جمّعتلك باقة ورد
من حديقة ابتسامتك الغميقه...
هيدا طائر الحنين
ضاع بالسما من سنين...
وبيتسرق من الشباك
تا يلمح عيوني الحلوين...
وهيك بيحبني
وأنا حبيتو
لأنو أغلى الغاليين.
يخلّيلي قلبك الحلو
تا يضلو يضحكو عيوني
خبرني بكل اللغات
وقلي قديش اشتقتلي...
يخليليقلبك الحلو
وجمال حروفك
وصباحك ومساك
يا عطر الإيام الجايي
رح ضل ازرعلك ببستان قلبي ورد
والعبير همساتك.
ما كنت أعرف إنو هالنظره
من عيونك الحلوين
فيها تغير حياتي
وتحملني عا كوكب عالي...
من قبلك كنت حزينه
وهربانه من سنيني
وهلق صرت انت وما عدت حالي...
يا حبيبي يا غالي
يا زنبق العالي...
بجرب اني ما حبك وبحبك.
بجرب اهرب منك
بلاقي حالي بعيونك.
يا امير حلو كتير...
يا قمر من دهب كبير.
عنوانك رمش عيوني
مطرحك بالقلب
وعنوانك رمش عيوني...
بالنهار بعرف وينك
وبالليل بعرف وينك
يا ساكن بأحلامي
يا فرح إيّامي...
كيف هيك؟
ما بشوفك ولا بحاكيك...
وبكل لحظة بلتقي فيك…
كيف هيك؟
كلما قول ما بحبّك
بحبّك أكتر...
وكلما إهرب من عيونك
شوقي لعيونك بيكبر؟
لقلبك وعيونك
جنينة زهر أحمر...
ولسكوتك الغميق
يللي من السما اكبر.
بعرف ابتسامتك
الصباح ما بيطلع
إلا من قلب الليل...
وأجمل الصباحات إلك.
بعرف ابتسامتك
بتلوّن طريقي بالورد والياسمين...
إنت قمر الجمال
وهيك رح ضل إكتبلك
قصايد الحنين والخيال.
هالنور بآخر الغابه
ابتسامتي...
وهيّي إلك وحدك...
ابتسامتي بتفضحني
كلما حدا قال إسمك.
صابيعك من دهب
أو نغمة قصب؟
ارسملي بالهوا قلب
متل قلبك رقيق وغالي
تا اسرقو وخبيه...
قلبك الي وحدي...
هيك كل يوم بقول
وهيك بحبك عاطول
وأكتر من هيك... بحبّك.
إنت معي ومش معي
وين بخبّيك؟
بدفتر حنيني؟
بخزانة أفراحي وذكرياتي معك؟
ليش قصتنا أنا ويّاك كانت صعبه؟
بدايتها عبير وحقول مليانه فرح
ونهايتها سؤال ما بلاقيلو جواب؟
هالصمت بيحكيلي عنك
قديش إنت مشتاق تكون حدي...
وتتطلع بعيوني تا تلاقي دقيقة أمان،
بعمر مليان أحزان.
وْلووو قديش حبّيتك
لأنك متل البحر الكبير...
لأنك متل الشتي
اللي نازل عالسهل...
لأنك كل لحظة من حياتي
فيها نور وقمح البيادر...
بحْزن عليك كيف هيك ناطر
عالطريق...
عالمقاعد...
تحت الشجر...
ولأنك بتحبني هلقد
سميتك قمر...
وسميتك وحدك وحدك
كل البشر...
منشرب القهوه سوا
بس كون حدّك بشتقلك
بس كون بعيده عنك بشتقلك....
ما عندي أصحاب الا الحنين
لعيونك الغاليين...
بتأمل فيهن
وبشكر الله عليك
لانو عطاني قصيده
فيها معاني جديده
وكلما تطلعت بعيونك
بتطْلع من قلبي تنهيده.
أميرة صغيره
زينت المزهريه المليانه ورود
ونطرت حبيبها
بعد هالغيبه الطويله...
كبرت الصبيه الحلوه
وتغيرت الأيام
وتبدلت الأحلام
والكلام بعدو بعدو
وبقلب المزهريه في كمشة أشعار
وغابه من الجمال
للحبيب الأسمر
وهلّق هيّي وعم تكبر
كل يوم بتشوف حبيبها
جايي تا يزورها مع ليل وخيل...
والورد غطّى الساحه من ميل لميل.
قلت: منشرب القهوة سوا
وهيك بيضل يمرجحنا الهوا...
انت بتشرب شفة مُرة
وبتحليها يضحكة حلوه من قلبك لقلبي...
ونسمة هادية من شجر الاحلام
بتداعب شعري بانغام ...
انت بتخبرني قصص العشاق ...
وبسحر كلامك بتكحّل عيوني
وقديش حلوه هيك الإيام
ع كتفك إغفى ونام ...
وقلّك: هيك بحبك.
السفينه بتاخدنا وبتجيبنا
والبحر بعيد...
القمر مناره...
ولولا هالقمر عا ايا مدينة منوصل
تا نكمش الارض اللي هربت من ايدينا؟
لا تعتب يا زمان
اذا قلنا انك كنت قاسي علينا...
ومن اول ما خلقنا لهلق
ما نمنا عا مخدّة حرير.. .
ولا غمضنا عينينا.
يا عيونك الحلوين
وين هالغيبة؟
إذا كنت مشغول ما بتحاكينا...
وأذا كان عندك وقت بتنسى أسامينا
يا عيونك الحلوين هني قصيدتين حب...
هني شطوط من حبر اسود ما لهن مينا...
ونحنا اذا غرقنا...
مين يا حلو غير اللي غرقنا... بينجينا؟
صباحك نغمات
على قيثارة الحنين.
حد شباكك هالعصفور الملون
تا يحكيلك عني...
انا اللي علمتو يغني
وعلمتو كيف يحب...
وهلق الغابه مليانه عشاق وأغاني
وكل غنيه بتخبر عني وعنك اسرار
نحنا اللي قصتنا أغمق من البحر
وأرق من الأشعار.
حبي الك دهب غالي لا بيعتق
ولا بيتغير.
ايه... هيك بحبك.
بنطر سلامك
بنطر سلامك عا نار
مشتاقة اسمع منك همسة حنان
ونغمة أمان...
شو بيطول الوقت
قبل ما وجك يطل
مع نور الشمس وسحر الكون...
غابة من التحيات والأماني
من قلبي بببعتلك...
من هلق لآخر المدى
جمعت مع نسمات الندى
حياة لروح ما بتعيش
إلا معك يا روح الروح...
لا تغمض عيونك بوجع أنا...
مش عارف اني بعيونك؟
حاكموني وشلحوني بقلب هالعتم...
كنت فكر إنو السواد مش حلو.
والليل بيخوف...
لا . مش رح اطلع من هون
لو عطيوني الكون...
ويسامحني القاضي...
أنا بحبس بعيونك بغفا
وبسافر مع الأحلام.
ورح ضل اسكن بعيونك...
من هلق تا يخلصو الايام.
عم فكر فيك يا قمر الليل
قولك الحلو فاكر ليالينا
أو ناسينا؟
مساء الياسمين
يا رموش الغاليين
يا فكرة عميقه بكتاب الحنين ..
حبي الك بحر وسما ونجوم عاليين
واكتر من هيك بحبك يا احلى الحلوين.
يخليلي هالقمر
وهالروح اللي عم تحكي من قلب الصورة،
وأسرار عم تخبر أسرار...
ونظرة غميقة فيها أمير حلو كتير...
كل يوم بيغزلي حرير...
وبيقلي: أنا بحبك قد الكون وأكتر...
والموعد ما بيتغير
أنا وإنتي وحدنا عالمقعد الأخضر
بالغابه الحلوة اللي فيها ربينا
وعالشجر كتبنا أسامينا
وما في زعل قادر يمحينا. وهيك بحبك.
الاحلى من الوردة إنت
وصوتك موسيقى الزمان
كل شي بينتَسى
وانت وحدك وحدك
بتتمرد عالنسيان.
بعيده عنك وقريب منك
وشو المشوار؟
غير دقة قلب
وروح بتحكي للحب أسرار؟
ضحكتك مرسومه عالحيطان
عالورق الأخضر...
اذا كنت قريب أو بعيد ما في شي بيتغير.
ليش البحر بيصير صحرا؟
أو النجمه اللي متل روحك بتضوي
شي يوم بتوقع وبتتكسر؟
انا هيك بحبك...
مشتاقة للمشتاق...
انا وانت ناطرين
مين رح يتلاقى بمين؟
مين رح يضحك لمين؟
يمكن نزعل ويمكن نرضى...
يمكن العشب يطلع عا حروف قصتنا
يمكن ما نعرف كيف بتخلص حكايتنا
كل شي يمكن
إلا كلمة "حبيبي" هيي الحقيقه
وهيي نبض قلبي الف مره بالدقيقة.
إلك وحدك ضحكاتي
شو حلوين كلماتك
وأنا كنت باحزان الايام...
يا فرح الحروف الغاليين
وشمس المشتاقين.
وشو بتسوى هالدني غير بسمة امل
وضحكة متل قلب السما؟...
بسلم عليك من ضجر الأيام وعتم الليل
وبقلك: صورتك الحلوة
مع النجمة مضوية بقلبي
ضلك يا حب اكتبلي عن الأحلام
والكلام ينقال لعطر الورد والياسمين...
وإلك وحدك ضحكاتي
وحياتي كتاب عنوانه حنين النغمات
وانت كل الحنان
ونغمة أمان
بكتابي.
ضحكات القلب ونبض الحنين..
لعيونك الحلوين ...
إنت انت انت يا فرح السنين.
حدّ شبّاكك هالعصفور الملوّن
الورده بتفتح عا اسمك واسمي
تا تكون احلى رسمه...
وهالعبير من اشواقك
وما احلى اشواقك!
بيلحقوني عا مطرح اللي بكون
ونظره منك بتفرح الدني
يا احلى عمر...
بتكبر بقلبي سنه عن سنه.
هيدا حلم أو نهر بيروح لعندك؟
بياخد حنيني واشواق سنيني
يا نغمه رقيقه
ابعتلي ورد الحديقه
اكتب لي عا كل ورده:
لما بكون وحدي
بكون مع الوحده
ولما بكون معك انت انت انت
بكون الحقيقه.
خسرت كتير ناس بحياتي،
وربحت كل الناس...
ربحتَك.
ببعتلك ورد المحبه
غمر ورا غمر
تا قلك: انت احلى حكاية حب.
انت فرح قلبي يا اغلى من العمر.
بكتبلك عا وراق الحنين قبل وبعد...
وكل لحظه صورتك بتطلع من السطور
بتضحكلي
وبشتاق كون معك...
لازم اتعود حب هالقمر وما اقدر طالو...
بوقف قبالو وبحكيلو عالهدا...
وبقلو انت وحدك حبيبي
واللي بيحب هلقد
لازم يبكي هوي وحالو عا حالو.
وهيك بحبك انا.
كرمالك يا فرح رتبت المواعيد...
وزينت شجرة العيد.
حَد شباكك هالعصفور الملون
تا يحكيلك عني...
انا اللي علمتو يغني...
وعلمتو كيف يحب
وهلق الغابه مليانه عشاق واغاني
وكل غنيه بتخبر عني وعنك اسرار
نحنا اللي قصتنا اغمق من البحر
وارق من الاشعار...
وهيك بحبك واكتر...
وحبي إلك دهب غالي لا بيعتق ولا بيتغير.
إيه… هيك بحبك.
عيون مشتاقه
شو بينكتب بعد لعيون أغمق من الليل
وأبعد من الافكار؟
النظره مشتاقه وما بتحكي
عاقله ورايقه كتير
بس بتحلم بالامير...
والأمير مسافر
هون وبعيد.
قمر ومش بالإيد
يا عمر اي متى رح تجمعنا
تا يخلص وجعنا؟
بركي شي غمره زغيره...
بركي شي كلمه زغيره
ولاد زغار بترجِّعنا.
شو بيعرفو الناس عني وعنك
غير كمشة أخبار وحكايات؟
يا ريت بيشوفو بعيونك شو في كلام...
لما تسرقو نجوم الليل عا حكايتنا
ضحكت الساحات
وضويت الأنوار.
بيني وبينك يا قمر قصة روح...
حكاية نور بينزل من الجبل العالي
والأميره الحلوه
بتقلك خليك هون حدي يا غالي...
صلا ورجا ببعتلك مع نور حبي...
هيك قصتنا
صفا وعمر وطريق بياخذنا
عا مطارح الحنين والوفا...
انت اكتبلي عن فرح المواعيد
وانا بقلك انت عندي كل العيد...
وهيك واكتر من هيك بكتير بحبك.
من كم سنة خبرتك
وقلتلك يا فرح وين بخبيك؟
بخاف يخطفك مني القدر
وتختفي مع اللي راحو بغابة النسيان
وصير فتش عليك وما لاقيك
وإحزن كيف بدي خبرك
قديش كنت انت فرح العيد
رح ارجع خبيك مطرح ما نطرنا سوا
نقطف العنب
وضجت فينا الدني
هونيك التقيو عصفورين حلوين...
هوي يقطف من العنب
ويدوق حبه ورا حبه
وهيي تقطف من عطر غناني
وتتدلل عليه وتقلو:
غنوجتك انا يا عمر جديد
بعرف الكرم لنا...
ومعك إنت إنت إنت حليت المواعيد.
إنت كلّ الناس بعيوني
ابتسامتي شعاع حقيقي من أشعة الشمس
وانت الشمس...
ابتسامتي نور دافي بعتمة الليالي
وانت قمر....
ابتسامتي نسمة رقيقة عا جفوني
وانت عيوني...
ابتسامتي سحر جمالي
وانت رونقها...
ابتسامتي سر وجودي
كانت منك وإلك...
لا تسألني
لمين أنا بكون
يا نور العيون؟
هالضحكه لمين؟
وليش هالعيون زعلانين؟
قولك مني او من عذاب السنين؟
انت كل الناس بعيوني
والناس غيرك خيالات
عالارض ماشيين.
يا ساكن بعيوني
وما بشوفك بعيوني.
برضى بالقليل
والنطره من زمان طويل.
وبتكفيني هالابتسامه الحنونه...
ومعليش.. معليش.. .
بالأحلام ايديك يغمروني.
وين الصورة؟
كل مرة بسألك عن الصوره
وبنطر منك صورة متل كل مره
بتعرف شو؟
هالمره ما عاد رح اسألك
لأنك أنت صورتي ومرايتي
وكل حكايتي
يمكن انطر منك شي ورده وغنيه وهديه
وكمشة قصايد بتحكي عني وعنك...
كلامك أحلى صوره
وابتسامتك بتكمل الصوره
وانا بشوفك وين ما كنت
لوحه حلوه
وبشوف بعيونك صورة عيوني...
يا أغلى من عيوني.
حكايتنا متل موج البحر
بعدني عا وتر الحلم
عم أعزف أمنيه
عم لحِّّن أمل
وعم اكتب نغم
ورتل أشواق...
كيف بخبرك إنك العالم
وكيف بقلك قديش بحبك...
كيف كيف؟
حكايتنا متل موج البحر
لحظه الشوق بيجمعنا
ولحظه ع شط الحب بيشلحنا
وبتبقى إنت كل الحكاية
وبقلبي مخبايه...
وهيك بحبك.
الورده مش رح يمحيها الشتي
رغم الوجع...
رغم البعد...
رغم الشعور بالخيبه...
زرعتها بقلب نقي...
قلب ما بيتغير.
هوي إلك وحدك إنت إنت إنت
يا قمري اللي بعيوني عم يسهر...
وبحبو أكتر من روحي.
وكل يوم بحبو أكتر.
كتاب الحنين
وشموع مضويه
والقوضه الزغيره فيها أنا وإنت
وعطر الياسمين...
وهيك بحبك أنا
يا كتاب عمري...
يا حكايه ما بتمحيها السنين.
الغالي اللي بيتو بالعالي
قلبو جليد...
ولا مره بيفكر يمسكني بأيدي
ويحكيلي قصة حب جديده...
وأنا سافر بالخيال
عا مدينه بعيده
خلف الجبال...
هيك بدنا نبقى؟
نشتاق...
تتعذب ونشقى؟
مره يا عمر اجمعنا...
بس تا يتطلع بعيوني
ويقلي كلمه حنونه
حبيبي هوي حبيبي...
وهوي القمر اللي سارح فوق جفوني...
وهيك بحبو.
بيتي برد الحيطان
بعدو الحلو عندي
وهوي قمري وعمري
لا نسيتو ولا نساني
بس بردت لأنو بعيد عني
لا قدرت أغفى
ولا قدر ينام حدي
من وقت اللي سافر لبعيد
وترك عالمخده ورده...
خبرو يا طير قديش في جفا بغيابو
وقلو لما فل...
دموعي ع المخدة دابو.
انا وانت والموج الهادي
منتخبى من الأسرار ورا الجبل...
ورا الغيم الازرق...
قصتنا مش رح تعتق
كل يوم بتخلق
وانت بقلبي متل ورده...
واللي بيجرحني
اني ولا يوم غرقت بعيونك
انت وقاعد حدّي...
وما قدرت قلك قديش بحبك
يا اغلى من روحي عندي.
قولك هالقمر بعدو عم يسهر عا بابي؟
قولك هالصوره بعدا عم تحكي بكتابي؟
الاهمال جرحني
وانا متل سنونو تحت الشتي...
بيتي برد الحيطان.
بس بحبك...
ان كنت معي او مش معي.
القمر تركني وراح
بس بعدو عالمخده
يا اغلى الناس عندي.
وهيك بحبك وأكتر.
أنا الوحيده بكتاب الورد
رح ينام القمر بكير
تعبان من كتر ما سرح بالليل
وتنقوز عالشبابيك والحيطان...
تركلي خيط زغير عا شباكي
وكتب بحبر الليل:
انا بحبك انتي انتي انتي
ولو شي مره زعلنا...
انتي صورة مطبوعة بعيوني...
ولو كنتي بعيده
بقشعك وين ما بتكوني.
وبحرسك بجفوني....
وهيك بحبِّك.
لأنك فرحان اشتريت هالبيت...
انا بنطرك عالسكيت
وانت بتتصيد من البحيره دهب وياقوت
بيلبقو عا فستاني...
لا تتصيد اميرات
تا ابقى وحيده عندك
وما تنساني
انا الوحيده بكتاب الورد...
وعيونك يا امير الليل
هنّي عنواني ...
وهيك بحبك.
هيدا القمر غير القمر...
هيدا جاسوس...
مخبر
بعتتو تا يسرق نظره من عينيك
ويرجع لعيوني المشتاقه...
الشباك مفتوح
والبردايه عم بتلوح...
وتا ابقى مخبايه مش مسموح...
هيك قال القمر ...
وقال: خليني شوفِك بالليل...
ولو كانت الفواكه بالنظر.
مسا الخير يا زنبق الدار
كنت حدّك واشتقتلك
وكنت بعيده واشتقتلك...
انا عصفورة الحنين
فيّي إهرب من الغابات
وإتخبى من الشتي...
بس خبّرني وين فيي إتخبى من اشواقي
يا روح قلبي ويا عمري اللي راح
ويا عمري اللي باقي...
خبّرني.
مسا الخير يا زنبق الدار...
يا ضحكة الفرح داير مندار...
فرحت بعيونك وما شفتك إلا لمحه
وقلبك كان عم يحكي معي
كلام شعر غالي كتير
ونظرة من عيوني
انطبعتْ عا قميص الحرير
وهلق بيشوفو الناس
وبيعرفو هودي عيوني
وهيدي كحلة جفوني
وبيسألوني...
ورح قلن بحبك انت انت
وما بعرف حدا إلا إنت
وهالنظرة الحنونه...
وهيك بحبك.
هالنظره لمين؟
ما بملك منها شي إلا وجع الحنين.
رح قلّك سرّ من أسراري:
ضحكتْ من عيوني
لما شفت القمر حدي
والناس معجوقين بالعيد
وانت وحدك بين الناس
فرح المواعيد.
الدمعه بعيوني
لانو الفرح ما بلاقي...
وحياتي معك هيّي اشواقي.
نهر اشواق بيروح من عندي لعندك...
بياخد معو انتظاري.
لو هالعينين بيلتقيو...
بيحكو.
وليش الزعل متل الغيم الازرق؟
سنين سنين هني الوجع
وحكايه عن تنين حبّو
ولبسو تياب السهر
لا هني بيلتقيو
ولا الحب بيخلص
لانو الحب هوي الحياة...
وهوي القدر.
قلت لحبيبي:
عيوني بيضحكو الك وحدك...
قلي: يخليلي هالضحكه
بهديها فرح قلبي...
اجمل من العيدانتي
يا عمر جديد.
يا ريت بلتقي فيك حبيبي
تا قلّك كلمه وحده...
ويبقى صداها اطول من العمر...
رح قلك: "بحبك"
يا اجمل قصيده بالعمر.
لو كانو عيونَك مخبّايين...
بعدهن بيكتبو فرح
عا كتاب قلبي...
بالحلم ماشيين
حبيت هالبيت البعيد
انا وحبيبي وسهر الليل… ومرجوحة مواعيد
بتمرجحنا من ميل لميل...
حِِكيلي عن اسرارو...
وقلي: الحب لازم يكون متل الحديقه
والنهر اللي رايح هوي وعم بيغني...
غمرني حبيبي غمرة حنين
وترك عا شالي عطر الياسمين
وطلعت الشمس وضحكت الشمس...
وبعدنا بالحلم ماشيين.
حلوه صورتَك قبل ما أعرفك.
وبعد ما عرفتك صرت احلى...
لأنك عا قلبي إنت الأغلى.
هلق إنت احلى لأنك بعيوني...
وبقلبي بتركض متل الريح المجنونه...
وعيوني اللي فيهن انت انت انت
بيحْكو عنك وبيفضحوني.
عم فكر فيك وما بقدر لاقيك
بفتش عنك تحت شجرة مواعيد
بغمض عيوني تا حاكيك
وبشوفك بقلبي عا طول
يا حلم بياخدني لبعيد… عا فرح المواعيد...
صباحك أحلى صباح
صباحك احلى صباح
قلبك اغلى قلب...
لا بسوق الدهب ولا باشعار العرب
لقيت متل روحك يا ورده رقيقه
وجمال الحقيقة.
كنت قبلك صحرا...
حياة جامده ما لها مضمون...
وحياتي معك جنينة عبير
وكل يوم بقول: تسلملي وحدك وحدك...
ويسلمولي هالعيون.
متل هالشجرة الوحيده
بنطر عا شباك الليل موعد حبيبي.
هوي النهر اللي بيضحك لي وبيغنيلي.
وشو حلو هالنهر!
بعرف قديش بيحبني وعندو حنين.
وبدو يحكيلي قصة عن بنت زغيره
وما بيعرف يحكي...
بس بين كل دمعه ودمعه بيقول: حبيبتي
وبيروح لبعيد... عا آخر الدني.
وبيرجع تا يسألني: اشتقتيلي؟
اشتقتلو وانا كمان ما بعرف قول.
يا حب مجهول
ليش خلقنا هيك صدفه بكتاب؟
قلبين هني الحلا...
بس هني الغياب؟
عم إقشعك بالكلمات...
بعنين الشجر...
عم إلمحك عالشبّاك واقف متل البرج
متل ما انت
ساكت وغميق...
أسرارك أبعد بكتير من البحر الكبير
صرخت: بحبك...
انكسر قزاز الصمت.
انكسر تلج انتظاري...
وما سألت وينك؟
لأنك ساكن بأفكاري.
قلي حبيبي بالعيد:
انتي خلقتي بقلبي
وحملتك عا ايديي
ومرجحتك عالمواعيد
تا كبرتي وصرتي صبيه
وعطاني حبيبي هديه ورده مخمليه...
وابتسملي بعيون حلوين...
عيونو يا امي كتير جهلانين
بيتنقلو من مطرح لمطرح وانا بستحي
كل الناس عيدوني بعيدي
بس هوي عيدني باسوارة جديده
وحبسني من ايدي
وشو بدي اغلى من هيك؟
وكلمة "حبيبتي" كتبها عا ورقه
ورسم عا الورقه زنبق الوادي...
واول مرة بحياتي قلت:
بحبك بحبك.
وصارت الكلمه شمعه بعيد ميلادي.
بعيد ميلادي فرحت
ورح افرح كل يوم
لانو الوردة اللي زرعتها هيي الخلود
وما بتموت انا وحدّّك...
وانت وحدك وحدك يا حبيبي.
حديقة ونهر..
مؤنث ومذكر.
مين قبل مين؟
ومين بينطر مين؟
بسأل حالي...
أنا بنطرك تا تمرق بأفكاري
وتلون فرح نهاري...
وهيك بحبك.
قديش بكتبلك ؟
وبنطر كلمه حلوه.
بيروح التران
وببقى عالمحطة ناطره.
تحت الشتي ناطره.
ليش حزينه هالنظرة؟
ليش بقلبي أسرار مخبايه
وسؤال عن عمر جايي؟
ليش بين الناس ما بلاقي حالي
كانو جناحي مكسور؟
كأني ضيعت جزء من روحي
وما عدت لاقيه؟
يا ساكن بعيوني
وما بشوفك بعيوني
يا حلم زماني والأحلام بعيده
عالمفرق نطرتك
تا اغمرك مرّه
تا قلك قديش بحبك
يا امير الفرح
عمري قبلك كان موال انجرح
وعمري معك هوي العيد
وخيمة المواعيد...
وكل حب جديد.
وهيك بحبّك.
مطرح ما شلحت عطرك
السنه ناقصه كلمه
لا انت بتقولها ولا انا
لانو اللي بيني وبينك
أكبر من كل المشاعر
اغمق من التفكير...
بيني وبينك كتاب صلا وعباده...
وروح بتسافر عا مطارح بعيده...
بقطف الزهره الحمرا
وبسأل: بحبك؟ ما بحبك؟
اكيد ما بحبك...
اكتر من بحبك بكتير يا حبيبي الأمير.
يا فرحي الكبير.
قولك ليش هيك تغير لون الفرح؟
شو صار تا ما عاد يزهر موسم الربيع؟
يمكن من شتي الايام والبرد القاسي...
يمكن عصفور الصباح انبح صوتو وما بقي غير الصدى
رح جرب من جديد اقطف حروف من دهب
مطرح ما شلحتْ عطرك يا حب عا شالي الأخضر
ولونت شجر الخريف بعطر الورد...
يمكن بالموسم اللي جايي
يرجع معي كل اللي غاب
وارجع إلك يا قمر المواعيد:
وقلّك يا حبيبي:
انت انت انت وحدك... كل العيد.
شمعة أمل
ضوّيت شمعة أمل
تا تضل حياتك امل...
ضويت شارع محبه
تا اعطيك المحبه...
سميتَك خلود الأعياد
ورح ابقى ازرعلك ورد
وتقطف غمر ورا غمر
لأنك اجمل سنبن العمر...
وهيك رح حبك كل يوم اكتر
ومهما الزمن بتغير
كل عيد حبك بقلبي بيكبر وبيكبر.
بالعيد الماضي بعتلي حبيبي
رساله بصوتو الحلو.
وقلي: انتي العيد.
وكلمة "حبيبتي" فرح المواعيد...
السنه ما بعتلي...
يمكن نساني أو راح مع حدا تاني
ورح تبقى السنة كلمة حنين
واربع حروف: ك ل و د.
هني كل اللغات وكل الكتب...
ورح ابقى ناطرتك حبيبي
عا مقعد حنيني
تا تغمرني وتحلا الدني
والغمره مش اقصر من سنه.
مش اقصر من مية سنه...
وهيك بحبك.
ما بيفرحني بهالعيد
إلا عيونك الغاليين
وقلبك الحلو...
عام ٢٠١٩
بيبلش بكلمة "حبيبي"
وهيي احلى عيد.
أحلى هديه مني إلك
قلبي النقي... وللأبد.
بالعيد أكتر من بحبَّك
شو لازم قلك بالعيد؟
كل الحكي انقال...
كل الهدايا عتقو
وتخزقو العلب...
وبعدو قلبي اللي حبك
قلبي ما بيهرب تحت الشتي
ما بيتغطى بالتلج
وصورتك يا قمر
هيي النبض للروح...
وكيف بقدر امحي صورتك
وهيي مبروزة بضلوعي؟
بقول بحبك؟
شو الحب؟
شو الحنين؟
يا قدر بيكحل عيوني...
وقديش بتحب عيوني الأغمق من الليل؟
قديش بتحب صوتي وضحكتي الرقيقه؟
بالعيد مش رح قول بحبك...
اكتر من بحبك بكتير.
وهيدي هيي الحقيقه...
اشواقي شجره مضوايه
وبشوفك حدي
وانت بعيد
وبكل يوم جديد...
حبي الك هوي فرح العيد...
وهيك بحبك.
أحلى كلمه بتقولها
"بشكر الله عليكي"...
وما فيّي إنسى
جمال هالكلمه.
شو حياتي إلاّ إنت؟
قلبي بينبض بحروف اسمك
قلي الطبيب:
أول مره بشوف قلب هيك بينبض
خمس حروف بالدقيقة...
قلتلو: بحبو هالحلو من زغرتي...
واللي مزعلني ما قدرت التقي فيه.
شو حياتي إلا أنت انت انت؟
وشو قلبي؟
ضمير مستتر تقديره أنت.
بتأمل فيك بصمت...
وصمتي بيصرخ وما بقدر حاكيك
تا قلك بحبك بغير كلمات...
بغير لغة...
بعطر الزنابق...
اكتب لك حبيبي عالشجر وعالقمر
يللي عيونك مرفأ لحنيني
وحبك الي عمري وسنيني.
وهيك بحبك.
عا قد ما الليل بيساع نجوم،..
عا قد ما التلج بينزل من السما..،
عا قد ما الأحلام بتركض فينا،..
وبتاخدنا من ليالينا...
هيك بحبّك
وكلما صوتك يروح مني
بيروح منّي الفرح...
يا قلب متل التلج أبيض ونقي...
يا روح ما بتغيب من روحي.
ما فيك تتصوّر قديش أنا بحبّك.
ما فيك تتصور.
التضحية مراية المحبه،
وإذا المحبة كانت بدون تضحيه،
المراية بتنكسر.
عا فكره… إنت مرايتي
وعا طول بتطلّّع فيك… بتطلّّع بحالي.
عيونَك كل الحنين
وانت وردة المحبين...
وبس قول ما بفكّر فيك...
بكون عم فكّر فيك
وحنيني بيكسر البواب
بيقطع بالعاصفه تا يفوت عا احلامك
وتشوف روحي يا روحي قدامك...
كل صورة فيها حكايه
وانت كل الحكايه
وعيونك مرفأ الحنين...
والبدايه.
حقوق النشر محفوظة للأديبة كلود ناصيف حرب